Mislingar

Hringdu í síma 1700 eða í þína heilsugæslustöð ef þú telur þig eða börn þín vera með mislinga eða þarfnast ráðgjöf varðandi mislinga.

EKKI mæta á heilsugæslustöð eða sjúkrahús.

Mislingar – staða mála og fræðsla – Measles outbreak info – Odrze informacja

Til hvaða ráðstafana er verið að grípa á Íslandi gegn mislingum?

Eins og fram hefur komið í fjölmiðlum þá hafa fjórir einstaklingar greinst með mislinga á Íslandi. Fyrsti smitaðist erlendis, en hinir þrír smituðust á Íslandi. Tveir fullorðnir einstaklingar hafa greinst og tvö börn. Allir einstaklingarnir voru óbólusettir eftir því sem best er vitað og smituðust allir þrír í flugi Iceland Air Connect þann 15.2.2019.

Þetta sýnir að mislingar eru mjög smitandi og smitast auðveldlega á milli einstaklinga í sama loftrými og við litla sem enga snertingu.

 

Sóttvarnalæknir, í samvinnu við heilsugæsluna, Landspítala, Læknavaktina og fleiri aðila, hefur unnið að eftirfarandi sóttvarnaráðstöfunum sem miða að því að hindra frekari dreifingu sýkingarinnar:

1 – Sóttkví

Allir einstaklingar sem eru óbólusettir og komist hafa í snertingu við mislingasmit er beðið um halda sig heima frá degi 6 til dags 21 eftir smit. Á þessum tíma geta veikindi komið fram og eru einstaklingar þá smitandi og verða reyndar smitandi um einum sólahring áður en veikindin byrja. Ekki þarf að setja bólusetta einstaklinga í sóttkví.

 

2 – Bólusetning gegn mislingum

Ef einstaklingur sem verður fyrir smiti er bólusettur innan 72 klst frá smiti þá eru góðar líkur á því að einstaklingurinn veikist ekki.

Mælt er með bólusetningu óbólusettra fjölskyldumeðlima þeirra sem komast í snertingu við mislingasmit því það mun koma í veg fyrir áframhaldandi útbreiðslu.

Bólusetningu má gefa börnum allt niður í 6 mánað aldur en árangurinn er ekki alveg ótvíræður á aldrinum 6-12 mánaða og þarf því að bólusetja þessi börn aftur við 18 mánaða aldur.

Ekki má bólusetja þungaðar konur og þá sem eru með alvarlegt eggjaofnæmi.

 

Forgangshópar eru:

  • All­ir sem eru óbólu­sett­ir og fædd­ir á bil­inu 1. janú­ar 1970 – 1. sept­em­ber 2018 (6 mánaða* – 49 ára).
  • Þeir ein­stak­ling­ar sem út­sett­ir hafa verið fyr­ir misl­inga­smiti ásamt þeirra nán­asta um­gangs­hópi.

Þess­ir hóp­ar eru hvatt­ir til að mæta í bólu­setn­ingu sem fyrst. 

 

Hverj­ir þurfa ekki bólu­setn­ingu?

  • Þeir ein­stak­ling­ar sem hafa verið bólu­sett­ir eða hafa fengið misl­inga þurfa ekki frek­ari bólu­setn­ingu.
  • Ein­stak­ling­ar sem fædd­ir eru fyr­ir 1970 hafa lang­flest­ir fengið misl­inga og eru því ekki í for­gangi í bólu­setn­ingu.

Ein­stak­ling­ar sem eru með sögu um eina bólu­setn­ingu eru ekki í for­gangi. Hægt verður að bjóða þeim bólu­setn­ingu síðar. Yngri en sex mánaða hafa ekki gagn af bólu­setn­ingu.

 

3 – Hvernig veit ég hvort ég hafi fengið bólusetningu?

  • Þeir sem eru fæddir eftir 1975 eru líklegast bólusettir nema foreldrar þeirra hafi hafnað bólusetningu.
    Allir fengu bólusetningarskírteini sem oft eru til í fórum foreldra þeirra. Ef bólusetning er skráð í kringum 12 ára aldur er það líklegast mislingabóluseting.
  • Hægt er að sjá bólusetningar sem gefnar voru eftir að farið var að skrá bólusetningar í rafrænan bólusetningargrunn inn á mínum síðum Heilsuvera.is eða á island.is
  • Þeir sem ekki eru vissir með þetta eða hafa áhyggjur geta leitað til heilsugæslunnar og fengið bólusetningu.

 

4 – Hverjir hafa fengið mislinga?

  • Þeir sem eru fæddir fyrir 1970 hafa líklegast fengið mislinga.

 

5 – Hver eru einkenni mislinga?

Einkenni mislinga koma fram um 10-12 dögum eftir smit og geta verið mismikil eftir einstaklingum. Þau byrja oft með flensulíkum einkennum þ.e. hita, nefrennsli, sviða í augum, hósta, bólgnum eitlum og höfuðverk. Á þriðja eða fjórða degi veikindanna koma í flestum tilfellum fram útbrot sem ná yfir allan líkamann og standa í 3-4 daga eða þar til sjúkdómurinn fer að réna.

Mislingar eru greindir með nefkokssýni sem tekið er á veirupinna. Svar tekur 3 – 4 klukkustundir. Áreiðanleiki sýnatöku er mikill ef einkenni eru komin en ekki ef einkenni eru ekki til staðar.

 

6 – Hvað á að gera ef einkenna verður vart?

Þeir sem telja sig, eða börn sín, vera með mislinga eiga að hringja á sína heilsugæslu eða í síma 1700. Ekki mæta á heilsugæslustöð eða sjúkrahús.

 

7 – Meðhöndlun veikra

Ef einstaklingar telja sig eða börn sín geta verið veik af mislingum þá er fólk beðið um að koma ekki beint á heilsugæslustöðvar eða sjúkrahús heldur hafa fyrst samband símleiðis í s. 1700 eða við sína heilsugæslustöð. Þar fær fólk ráðleggingar og mun sjá um að senda lækni heim til viðkomandi ef ástæða þykir til, til að greina og staðfesta sýkinguna. Einnig verður hægt að senda viðkomandi á sjúkrahús til meðferðar samkvæmt fyrirfram ákveðnum leiðbeiningum sem gefnar verða.

 

8 – Upplýsingar um mislinga og mislingasmit

Til að fá upplýsingar um mislinga og mislingasmit má hringja í síma 1700 og einnig til heilsugæslustöðva.

 

Sóttvarnalæknir telur litlar líkur á útbreiddum faraldri hér á landi ef öllum ofangreindum varúðarráðstöfunum verður fylgt. Að auki er rétt að benda á að almenn þátttaka í bólusetningum hér á landi er um 90-95% sem á að duga til að koma í veg fyrir útbreiddan faraldur.

Lestu nánar um mislinga á Heilsuveru